Tónlistarskóli

Við Stórutjarnaskóla starfar tónlistarskóli, sem er hluti af Stórutjarnaskóla og lýtur yfirstjórn skólastjóra.  Tónlistarskólinn starfar eftir þeim námskrám, lögum og reglugerðum um tónlistarskóla sem í gildi eru á hverjum tíma.  Hlutverk skólans er að glæða áhuga á tónlist og tónlistariðkun á starfssvæði sínu, annast kennslu í hljóðfæraleik ásamt öðrum tónlistargreinum og búa nemendur sína undir áframhaldandi nám í tónlist.  Rétt til náms við tónlistarskólann hafa íbúar á skólasvæði Stórutjarnaskóla.  Verði aðsókn meiri en hægt er að sinna skulu nemendur Stórutjarnaskóla njóta forgangs. 

Við tónlistarskólann starfar deildarstjóri sem ber faglega ábyrgð á tónlistarkennslunni og öðru innra starfi.  Deildarstjóri skipuleggur starf tónlistarskólans og fer með daglega stjórnun hans í samráði við skólastjóra.

Í vetur verða kennarar við tónlistarskólann tveir:
 

       Jaan Alavere, deildarstjóri  (píanó, fiðla, trommur, gítar, bassi)
       Marika Alavere  (píanó, blokkflauta, hljómborð)
 

Hljóðfæratímar
 

Fyrirkomulag kennslu:
Kennararnir sækja yngri nemendur í spilatíma úr tímum grunnskólans. Ætlast er til að eldri nemendur passi upp á sína tíma sjálfir.  Sú staða getur komið upp að vinna í grunnskólanum, t.d. próf eða ferðalög koma í veg fyrir að hægt sé að taka nemanda í tónlistartíma.  Reynt verður þó eftir föngum að forðast slíkt.
Í tónlistartímunum vinnur nemandinn undir leiðsögn kennara verkefni sem þyngjast stig af stigi. Fyrstu ár yngstu nemendanna felast að mestu í þjálfun undirstöðuatriða tækni, agaðra vinnubragða og umgengnisatriða varðandi hljóðfærið.

Tónleikar og aðrar uppákomur:
Reynt er jafnt og þétt að venja nemendur við að koma fram og leika lögin sem þeir eru að æfa fyrir áheyrendur.  Nemendur fá tækifæri til að koma fram á menningarstundum í skólanum og öðrum uppákomum og hátíðum á vegum skólans, auk hefðbundinna tónleika fyrir jól og að vori.  (Sjá nánar á skóladagatali.)
 

Heimanám/æfingar:
Alger undirstaða framfara í tónlistarnáminu er að nemandi æfi sig heima og er þá betra að hann æfi sig stutta stund á hverjum degi en að hann sitji lengi við, daginn fyrir spilatímann.